បញ្ចូលអត្ថបទ ៖ ផ្កាយព្រឹក
ថ្ងៃអង្គារ ទី២៨ ខែមេសា ឆ្នាំ២០១៥ ម៉ោង ១៥:៥៣
រាជធានីភ្នំពេញ ៖ សហព័ន្ធកីឡាបាញ់កាំភ្លើងកម្ពុជា ដែលបានបាត់ឈ្មោះពីក្នុងបញ្ជីតាំងពីឆ្នាំ២០០៨ មកនោះ ពេលនេះបានចាប់ដំណើរការវិញហើយតាមរយៈការរៀបចំធ្វើមហាសន្និបាតលើកទី១ ជ្រើសតាំងសមាជិកគណៈកម្មាធិការប្រតិបត្តិរបស់ខ្លួន (២០១៥-២០១៨) កាលពីថ្ងៃទី២៧ មេសា កន្លងទៅនេះ ។
សមាជិកគណៈកម្មាធិការប្រតិបត្តិនៃសហព័ន្ធកីឡាបាញ់កាំភ្លើងកម្ពុជាមានចំនួន១៣រូប ក្នុងនោះលោកឧត្តមសេនីយ៍ឯក មៀច សុផាន់ណា ត្រូវបានជ្រើសតាំងជាប្រធាន, លោកឧត្តម សេនីយ៍ឯក ចាប ភក្តី, លោកឧត្តមសេនីយ៍ឯក ប៊ុត សុភាព, លោក វ៉ាត់ ចំរើន និងលោកឧត្តមសេនីយ៍ឯក នុត សវនា ជាអនុប្រធាន ។ លោកប៊ុយ សុភ័ណ្ឌ អគ្គលេខាធិការ, លោកម៉ៅ សូវង្ស, លោកវុត្ថា បុ៉ណ្ណារិទ្ធ និងលោកមៀច សុវិសាល ជាអគ្គលេខាធិការរងដូចគ្នា។ លោកខៃ វណ្ណៈ អគ្គហិរញ្ញឹក លោកឧត្តមសេនីយ៍ទោ លីវ សុផាណារិទ្ធ, លោកសុខ សង្វា លោកឧត្តមសេនីយ៍ទោ អុិន សាវុធ លោកស្រីឧត្តមសេនីយ៍ត្រី ស៊ំ សុខា និងលោក សុខ សារុំ ជាសមាជិក ។
គួររំលឹកផងដែរថា លោកស្រីឧត្តមសេនីយ៍ត្រី ស៊ំ សុខា និងលោកសុខ សារុំ គឺជាកីឡាករ-កីឡាការិនីបាញ់កាំភ្លើងដែលធ្លាប់ដណ្តើមបានមេដាយសំរឹទ្ធយ៉ាងច្រើនពីព្រឹត្តិការណ៍ប្រកួតនៅលើឆាកអន្តរជាតិនាពេលកន្លងមក ។ លោកវ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជាអនុប្រធានសហព័ន្ធកីឡាបាញ់កាំភ្លើងកម្ពុជា បានឱ្យដឹងថា សហព័ន្ធកីឡាបាញ់កាំភ្លើងកម្ពុជាត្រូវបានបង្កើតឡើងតាំងពីឆ្នាំ១៩៩៤ មកម្ល៉េះ ។ កាលណោះលោកឧត្តមសេនីយ៍ នាង ផាត ជាប្រធាន លោកមុិល កាដូ ជាអគ្គលេខាធិការ បុ៉ន្តែក្រោយមកតំណែងអគ្គលេខាធិការត្រូវធ្លាក់ទៅលើលោកប៉ា យុ៉ន វិញ ប៉ុន្តែពេលនេះលោកប៉ា យុ៉ន បានទទួលមរណភាពទៅហើយ ហើយសហព័ន្ធមួយនេះលែងមានសកម្មភាពអស់រយៈពេល៧ឆ្នាំ គឺតាំងពីឆ្នាំ២០០៨ ។ បុ៉ន្តែពេលនេះក្រោយពីមានការជួយជ្រោមជ្រែងពីគ្រប់ស្ថាប័នពាក់ព័ន្ធរួចមកសហព័ន្ធកីឡាមួយនេះបានចាប់ផ្តើមមានសកម្មភាពវិញហើយ ។
លោកឧត្តមសេនីយ៍ឯក មៀច សុផាន់ណា ដែលទើបត្រូវបានជ្រើសតាំងជាប្រធានសហព័ន្ធបានសំណូមពរដល់គ្រប់មជ្ឈដ្ឋានទាំងអស់ ត្រូវរួមសហការគ្នាដើម្បីជួយជំរុញឱ្យសហព័ន្ធកីឡាបាញ់កាំភ្លើងមួយនេះអាចដំណើរការឡើងវិញបានល្អសម្រាប់ត្រៀមខ្លួនប្រកួតក្នុងនាមជាម្ចាស់ផ្ទះនៃការប្រកួតកីឡាស៊ីហ្គេមឆ្នាំ២០២៣ ខាងមុខ ៕
No comments:
Post a Comment